តើសហគមន៍អន្តរជាតិអាចធ្វើអ្វីបានខ្លះដើម្បីឲ្យកងទ័ពភូមាប្រគល់អំណាចទៅឲ្យលោកស្រីអ៊ុង សានស៊ូជីវិញ?
នៅក្នុងប្រទេសភូមា ២៤ម៉ោងក្រោយរដ្ឋប្រហារទម្លាក់រដ្ឋាភិបាលស្របច្បាប់របស់លោកស្រីអ៊ុង សានស៊ូជីមក សហគមន៍អន្តរជាតិកំពុងបន្តបញ្ចេញប្រតិកម្មថ្កោលទោសលើក្រុមឧត្តមសេនីយភូមា និងបានជំរុញឲ្យពួកគេដោះលែងលោកស្រីអ៊ុង សានស៊ូជីជាបន្ទាន់។ ក្រុមប្រឹក្សាសន្តិសុខអង្គការសហប្រជាជាតិបើកកិច្ចប្រជុំបន្ទាន់ក្នុងថ្ងៃអង្គារ ទី២ កុម្ភៈដើម្បីជជែកពីស្ថានការណ៍នៅក្នុងប្រទេសភូមា។ ចំណែករដ្ឋបាលអាមេរិករបស់លោកប្រធានាធិបតីចូ បៃដិនដែលបានអំពាវនាវឲ្យក្រុមយោធាដោះលែងលោកស្រីអ៊ុង សានស៊ូជីបានគំរាមដាក់ទណ្ឌកម្មជាថ្មីលើភូមា។ តែរហូតមកដល់ថ្ងៃនេះ ក្រុមឧត្តមសេនីយភូមាហាក់ធ្វើមិនដឹង មិនឮចំពោះការអំពាវនាវរបស់សហគមន៍អន្តរជាតិ។
